- 731 -

1448. Mai 20.

Vnsern frundlichen grus zuuor. Erber vnd weize, lieben frunde vnd gonner. Es sein sachen an vns komen, die wir euch nicht geschreiben vnd empieten konnen vnd dorumme bitten wir euch gar mit fleisse, ir wellit den erbern Mathis Gruczenschreiber ewern burgermeister mit eyme gesworen ewirs rates vff die nehistkomen mittewoche frwe vmbe ymmes czeit czum Newnmargte komen lossen, so wellen wir Hanns Popplow vnsern burgermeister auch mit eyme gesworen vnsirs rates vff die genante czeit aldo zum Newnmargte haben, die die sachen mittenandir handiln vnd obirtragin werdin, was ewir vnd vnsir bestis ist, vnd das die ewirn destir fruer aldohen komen, das iglich teyl wieder hindir sich den tag komen moge, das bitten wir ewir verschreben antwort ylende bey diesem boten, das wellen wir gerne vorschulden. Geben am montage noch Trinitatis anno etc. XLVIII.
Ratmanne der stat Breslow.

Mit Rückaufschrift an den liegnitzer Rath.

Orig. Kgl Bibl z. Berl Ms. Boruss. f. 568. No. 31.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866